Саха сиригэр Ийэ сылыгар хас да бэлиэ даатаны бэлиэтиибит. Ол курдук, быйыл Саха АССР төрүттэммитэ – 100, Дьокуускай куорат тэриллибитэ – 390, Туймаада хочотугар ыһыах ыһыллыбыта 25 сыла. Бу эргиччи үбүлүөйдээх сылга Дьокуускайбыт сибэккинэн симэниэҕэ.
“Служба эксплуатации городского хозяйства” МКУ салайааччыта Светлана Чусовская өрөспүүбүлүкэбит киин куоратын көҕөрдүүгэ туох үлэлэр ыытыллаары туралларын кэпсээтэ.
– Светлана Валерьевна, хамсык турбут бүтэһик икки сылыгар куораппыт күөҕүнэн киһи сөҕөр гына симэммэтэҕэ. Быйыл туох былааннааххытый? Төһө үп көрүлүннэ?
– “Көҕөрдүү” хайысхатыгар куораты тупсарыыга муниципальнай бүддьүөттэн уопсайа 19 мөл. солк. көрүлүннэ. Бу үп Кыайыы, Орджоникидзе болуоссаттарын, Ийэ искибиэрин, “Туймаада саллаата” мемориальнай комплексы, Георгий Победоносец кытылын уонна да атын уопсастыбаннай сирдэри көҕөрдүүгэ, сибэкки композициятынан киэргэтэргэ, өҥ буору атыылаһарга, мастары, бөлөх уктаах үүнээйилэри олордорго ананна.
Бүддьүөт үбүнэн 114 тыһ. сибэккини атыылаһар былааннаахпыт. Уопсастыбаннай сирдэри, искибиэрдэри сибэккинэн киэргэтии Ийэ, Саха АССР – 100, Дьокуускай 390 сылыгар сыһыаннаах буолуоҕа. Кохия олордуутугар эмиэ болҕомтобутун ууруохпут. Үчүгэйэ диэн бу үүнээйини кырыйан араас композицияны оҥоруохха сөп. Муниципальнай сулууспалар көмөлөрүнэн бүддьүөт харчытынан 4000 кэриҥэ мас уонна бөлөх уктаах үүнээйи олордуллуоҕа.
– Быйыл көҕөрдүү үлэтигэр туох саҥа сүүрээни киллэрэр былааннааххытый?
– Олохтоохтор сынньанар, дьаарбайар сирдэригэр сибэкки вазоннарын туруорарга былаанныыбыт. Олорго декоративнай табах олордуохпут. Бу үүнээйини 2020 с. олордубуппут. Куорат олохтоохторо олус сөбүлээбиттэрэ. Итини сэргэ Ийэ искибиэригэр Ийэ сылыгар анаан скульптура туруоруохпут. Территориальнай управление уорганнара, куорат кытыы сэлиэнньэлэрэ олорор уокуруктарын хайдах киэргэтэллэрин, көҕөрдөллөрүн кэпсээн-көмүскээн тураллар. Элбэх сонун идиэйэ баар. Хас биирдии түөлбэ анал тиэмэни талбыт.
– Дьокуускай куорат дьаһалтата көҕөрдүүгэ саҥа күрэҕи биллэрбитин туһунан иһитиннэрии баара. Ол “Мөлүйүөн сибэккиттэн” туох уратылаах буолуоҕай?
– Оннук, урукку өттүгэр “Мөлүйүөн сибэкки” күрэх ыытыллара. Судургу ирдэбиллээх буолан кыайыылаахтар улахана суох суумалаах граны субсидия быһыытынан ылаллара. Хас сыл аайы көҕөрдүүнэн дьарыгырар, биллэр улахан тэрилтэлэр кыайаллара. Быйыл саҥа сүүрээни киллэрээри атын күрэҕи тэрийдибит. Онон, хас биирдии киһи “Зеленый кубок столицы” саҥа күрэх устуоруйатыгар аатын хаалларар, кыттар, кыайар кыахтанна.
– Кимнээх ханнык хайысхаларга кыттыахтарын сөбүй?
– Күрэх анал аата элбэх: “Цветующий город”, “Цветущий двор”, “Цветущий сад”, “Цвет знаний”, “КохиМания”, “Эколидер”, “Зеленый кубок столицы”. Баларга хас биирдии киһи кыттар кыахтаах. Үлэ ис хоһоонун, хаачыстыбатын таһынан идиэйэтэ төһө сонунун, саҥа хайысхаҕа үлэлээбитин-суоҕун эмиэ учуоттуохтара. Күрэх 2 түһүмэҕинэн ыытыллыаҕа. Сайаапкалары атырдьах ыйын 1 күнүгэр диэри хомуйаллар.
– Куорат олохтоохторо ханнык көҕөрдүү үлэтигэр кыттыахтарын сөбүй?
– Хамсык кэмигэр хааччахха олорон дьон-сэргэ аахсыйалары, субуотунньуктары ахтыбыт буолуохтаах. Сибэккини уонна маһы олордууга сыл аайы ыытыллар аахсыйалаахпыт. Ол чэрчитинэн үөрэнээччилэр сибэкки арассаадатын олордоллор, көрөллөр-истэллэр уонна оскуолаларга тарҕаталлар. Хас биирдии оскуола туһунан көрүүлээх.
– Быйыл төһө маһы олордоҕутуй?
– Үбүлүөйдээх сылбытыгар куорат тэрилтэлэрэ, түмсүүлэрэ, уопсастыбанньыктара ааксыйалары, субуотунньуктары тэрийиэхтэрэ. Уопсайа 10 000 маһы, бөлөх уктаах үүнээйини олордуохпутун баҕарабыт.
Мастары, үүнээйилэри, сүрүннээн, “Ворота Якутска” былаһааккаҕа, Гагарин аатынан искибиэргэ, Кыайыы пааркатыгар олордуохтара. Кыайыы искибиэригэр “Сад памяти” маҥнайгы аахсыйа ыам ыйын 20 күнүгэр ыытыллыбыта. Куорат олохтоохторун субуотунньуктарга, “Зеленый кубок” күрэ көхтөөхтүк кыттаргытыгар ыҥырабыт!
– Бу үүнээйилэри, мастары ким көрүөй-истиэй?
– Манна быйыл кэккэ уларыйыы таҕыста. Куорат дьаһалтатын дьаһалынан тэрилтэлэри, биэдэмистибэлэри сыһыардылар. Маны таһынан сыл устата мастар уопсай ахсааннарын инбэнтээрдээһинэ ыытыллыаҕа, төһө үүнэллэрин анаалыстыахтара. Мас кыайан үүммэтэх сиригэр эһиил дьоҕус бөлөх уктаах үүнээйилэри олордуохтара.
Өскөтүн муниципальнай сулууспалар, уопсастыбанньыктар, тэрилтэлэр, биэдэмистибэлэр бары көхтөөхтүк кыттыстахтарына, аҕыйах сыл иһигэр куораппыт биллэ уларыйыаҕа, тупсуоҕа.
“Служба эксплуатации городского хозяйства” МКУ уонна куорат дьаһалтатын пресс-сулууспата бэлэмнээтилэр.
