Сымыыт хаата хас ыал аайы баар. "Туһата суох, мэһэй-таһай эрэ буолар" диэн быраҕан кэбиһэбит. Сымыыт хаатын арааска туһаныахха сөп. Онон, быраҕарга тиэтэйимэҥ. Хата, ыскаап түгэҕэр сааһылаан, ууран иһиҥ.
Кирээдэҕэ бэлиэтэ оҥор
Моркуобу халлаан туругуттан көрөн ыам ыйын ортотуттан бэс ыйын саҕаланыытыгар диэри кирээдэҕэ олордобут.
Буору үчүгэйдик көбүтэн баран, кыраабылынан ньуурун тэҥниибит. Ол кэннэ 30 устуука сымыыт угуллубут улахан хаатын буорга батары баттаан тэҥ кээмэйдээх хайаҕастары оҥоробут. Ити курдук кирээдэ устатын тухары барабыт. Баҕар, сорохтор "тугун эмиэ моһуогай, тарбаҕынан да бэлиэ оҥоруохха сөп" диэххит. Биир тэҥник олордуллубут моркуоп тэҥ кээмэйдээх, көнө буола үүнэр. Уутун-хаарын былдьаспат, эрийэ-буруйа үүммэт. Итиэннэ уурбут-туппут курдук, үүнэн турар оҕуруот аһын көрөр-истэр, уу кутарга да судургу бөҕө буоллаҕа.
Сымыыт хаатын туһанан, улахана да суох кээмэйдээх ханнык баҕарар үүнээйини олордуохха сөп. Холобур, эрэдьиискэни, луугу, петрушканы, укуруобу уо.д.а.
Иистэнэр малы-салы угуҥ
Иистэнэр бытархай малы-салы улахан иһиккэ угар төрүт табыгаһа суох. Тимэҕи, сүүтүгү көрдүүргэ күн-дьыл баранар.
Манна хаппахтаах сымыыт хаатын туһаныахха сөп. Туох да эбии матырыйаал наадата суох. Ыллыгыт да, уган кэбистигит. Бүттэ! Арай бэйэҕит баҕаҕытынан киэргэтэн биэриэххитин сөп.
Луугу үүннэрэргэ – бэртээхэй иһит
Ордук куорат дьоно дьиэ түннүгэр луугу үүннэрэллэр. Луук төгүрүк быһыылаах буолан, түбэһиэх иһиккэ кыайан турбат. Онтон сытыаран эрэ үүннэрдэххэ, ото эрийэ-буруйа үүнэр, сүгүн ас биэрбэт.
Сабыллар сымыыт хаатын ылабыт уонна токуруйар сирин кырыйабыт. Үөһээ өттүгэр сытыахтаах хаа төгүрүктэрин луук батар гына хайаҕастаан кырыйабыт. Онтубутун бүтүн төгүрүктэрдээх хаа үөһэтигэр уурабыт. Хайаҕастарга уу кутан баран, лууктарбытын биир-биир "олордон" кэбиһэбит. Манна кумааҕы сымыыт хаатын буолбакка, былаастык хаҕы туһанабыт.
Иһиппитин күн көрөр сиригэр ууран кэбиһэбит. Луукпут хамсыы-хамсыы үүммүтүнэн барыаҕа.
Куоскаҕа – пуф
Куоска олус дьиэмсэх. Дьиэ хайа эрэ муннугар бэйэтэ туһунан уйалаах буолуохтаах. Маҕаһыыҥҥа куоскаларга аналлаах күн көрөр-көрбүт малын-салын барытын атыылыыллар эрээри, онтуларбыт ботуччу сыаналаахтар.
Сымыыт хаатын туһанан бэрт тупсаҕай пуф оҥоруохха сөп. Түөрт-биэс сымыыт хаатын үрүт-үрдүгэр уурабыт. Килиэйинэн холбуу силимнээн баран, үрдүгэр кыракый сыттыгы эбэтэр дьоҕус таҥаһы уурабыт. Хайдах баҕарар ойуулуохха, араастаан кырааскалыахха сөп. Оҕолор бэйэлэрэ оҥордохторуна, өссө үчүгэй.
Оонньуу!
Сымыыт хаатыттан араас оонньууну оҥоруохха сөп. Кыылы-сүөлү, мультик дьоруойдарын уо.д.а.
